Fréttasafn

Fimmtudaginn 3. mars kl. 12.15-12.45 verður boðið upp á leiðsögn í Listasafninu á Akureyri um sýningar Jóns Laxdal Halldórssonar, ...úr rústum og rusli tímans, og Noemi Niederhauser, Ráfandi skrúðganga. Hlynur Hallsson safnstjóri og Jón Laxdal taka á móti gestum og fræða þá um sýningarnar. Aðgangur er ókeypis.

Þriðjudaginn 1. mars kl. 17-17.40 heldur Sandra Rebekka Dudziak, myndlistarmaður og kennari, Þriðjudagsfyrirlestur í Listasafninu á Akureyri, Ketilhúsi, undir yfirskriftinni Má ekki bara sleppa þessum listgreinum? – Hlutverk listgreina í skólastarfi. Í fyrirlestrinum fjallar Sandra Rebekka um hlutverk listgreina í skólastarfi og mikilvægi þeirra í þroska og námi barnanna sem koma til með að móta framtíð samfélagsins.

Framundan eru síðustu dagar samsýningarinnar í drögum / Prehistoric Loom IV sem staðið hefur í Listasafninu, Ketilhúsi síðan 23. janúar, en henni lýkur næstkomandi sunnudag. Sýningin skoðar teikninguna sem tímabil í ferli listsköpunar, nánast hulið ferli sem markar andartak milli hugsunar og framkvæmdar. Í þessu óræða rými má greina bergmál persónulegra og faglegra tengsla sem einkenna samfélög listamanna. í drögum / Prehistoric Loom IV er ávöxtur þeirra sambanda sem mynduðust hjá meistaranemum við Glasgow School of Art í Skotlandi árið 2014.

Laugardaginn 27. febrúar kl. 15 verður opnuð í Listasafninu á Akureyri, Vestursal sýning svissnesku listakonunnar Noemi Niederhauser, Ráfandi skrúðganga. Sýningin er sviðsetning á látbragði, hreyfingum, gjörðum og hrynjandi þar sem merking og áhersla er sífellt fjarlægð.

Lokunarteiti sýningar Baldvins Ringsted, Snarstefjun, annar hluti: Bárujárnsárin, er í dag kl. 15. Þar gefst gestum og gangandi tækifæri til þess að skoða sýninguna í síðasta sinn og þiggja léttar veitingar. Verið velkomin.

Fimmtudaginn 25. febrúar kl. 12.15-12.45 verður boðið upp á leiðsögn í Listasafninu á Akureyri, Ketilhúsi um samsýninguna í drögum / Prehistoric Loom IV, en þar sýna 27 listamenn víðs vegar að úr heiminum, þar af sjö íslenskir. Hlynur Hallsson safnstjóri tekur á móti gestum og fræða þá um sýninguna. Aðgangur er ókeypis.

Þriðjudaginn 23. febrúar kl. 17-17.40 heldur Kristín M. Jóhannsdóttir aðjúnkt við Hug- og félagsvísindadeild Háskólans á Akureyri Þriðjudagsfyrirlestur í Listasafninu á Akureyri, Ketilhúsi, undir yfirskriftinni Íslensk tunga í Vesturheimi. Í fyrirlestrinum verður fjallað um stöðu íslensku í Vesturheimi og hvernig samfélagið sjálft spilar þar inn í. Sérstök áhersla verður lögð á þær breytingar sem orðið hafa á málinu og hvað það er sem breytist eða jafnvel glatast í máli einstaklinga og samfélaga.

Föstudaginn 19. febrúar kl. 11.45-12.45 verður dansað gegn ofbeldi í Listasafninu, Ketilhúsi undir yfirskriftinni Milljarður rís 2016. Í ár er dansað fyrir konur sem eru á flótta og leggja líf sitt að veði í leit að öruggara lífi fyrir sig og börnin sín. Þetta er í fjórða sinn sem viðburðurinn er haldinn og hafa hátt í 10 þúsund manns komið saman síðastliðin fjögur ár og fylkt liði á dansgólfum landsins. Í ár verður dansinn stiginn í Reykjavík, Akureyri, Ísafirði, Seyðisfirði, Reykjanesbæ, Neskaupsstað og á Höfn í Hornafirði. UN Women á Íslandi og Sónar Reykjavík skora á alla; Vinnustaði, skóla og vinahópa til að mæta með dansinn að vopni.

Fimmtudaginn 18. febrúar kl. 12.15-12.45 verður boðið upp á leiðsögn í Listasafninu á Akureyri um sýningar Jóns Laxdal Halldórssonar, ...úr rústum og rusli tímans, og Baldvins Ringsted, Snarstefjun, annar hluti: Bárujárnsárin, sem var opnuð um síðustu helgi. Haraldur Ingi Haraldsson verkefnastjóri Listasafnsins tekur á móti gestum og fræðir þá um sýningarnar. Aðgangur er ókeypis.

Þriðjudaginn 16. febrúar heldur þýska textíllistakonan Claudia Mollzahn Þriðjudagsfyrirlestur í Listasafninu á Akureyri, Ketilhúsi, undir yfirskriftinni Textiles in Movement. Þar fjallar hún um þroskaferli sitt í listinni með því að skoða eigin verk og tilvísanir í listamenn sem hafa haft áhrif á hana. Aðgangur er ókeypis.