Fréttasafn

Í tilefni af Jónsmessu verður opið allan sólarhringinn í Listasafninu og aðgangur ókeypis. Að venju verður opnað kl. 10 að morgni fimmtudagsins 23. júní en safninu ekki lokað fyrr en kl. 17 föstudaginn 24. júní.

Jónsmessuvaka verður haldin á Akureyri dagana 23.-24. júní þar sem meðal annars verður boðið upp á sólarhrings opnun í verslunum og söfnum bæjarins. Dagskrána má sjá hér að neðan.

Fimmtudaginn 16. júní kl. 12.15-12.45 verður boðið upp á leiðsögn í Listasafninu á Akureyri um sýninguna Nautn – Conspiracy of Pleasure, sem var opnuð um síðastliðna helgi. Hlynur Hallsson sýningarstjóri tekur á móti gestum og fræðir þá um sýninguna. Aðgangseyrir er 1.000 krónur og gildir jafnframt á sýninguna Arkitektúr og Akureyri í Listasafninu, Ketilhúsi.

Sunnudaginn 12. júní kl. 15-16 verður listamannaspjall í Listasafninu um sýninguna Nautn / Conspiracy of Pleasure sem verður opnuð næstkomandi laugardag, 11. júní, kl. 15.

Laugardaginn 11. júní kl. 15 verður opnuð sýningin Nautn / Conspiracy of Pleasure í Listasafninu á Akureyri. Hin ýmsu lögmál og birtingarmyndir nautnar eru útgangspunktur sýningarinnar. Sex listamenn sýna ný verk, þar sem þeir fjalla um hugtakið, hver frá sínu sjónarhorni og forsendum, og efna til orðræðu um hlutverk nautnar í heimspekilegu, listrænu og veraldlegu samhengi. Í verkunum má sjá þráhyggjukenndar birtingarmyndir neysluhyggju og kynlífs í samtímanum, holdið í myndlistinni, mannslíkamann sem táknrænt fyrirbæri og innblástur eða einfaldlega hina frumstæðu nautn sem oft fylgir listsköpun, glímunni við efni og áferð, áráttu og blæti.

Fimmtudaginn 2. júní kl. 12.15-12.45 verður boðið upp á leiðsögn í Listasafninu á Akureyri, Ketilhúsi um sýninguna Arkitektúr og Akureyri. Sýningarstjórarnir Helga Björg Jónasardóttir og Haraldur Ingi Haraldsson taka á móti gestum og fræða þá um sýninguna. Aðgangur er ókeypis.

Fimmtudaginn 26. maí kl. 12.15-12.45 verður boðið upp á síðustu leiðsögnina um ljósmyndasýninguna Fólk / People í Listasafninu, en sýningunni lýkur næstkomandi sunnudag 29. maí. Hlynur Hallsson safnstjóri tekur á móti gestum og fræðir þá um sýninguna. Aðgangur er ókeypis.

Á tímabilinu 1. júní til 31. ágúst verður innheimtur aðgangseyrir að upphæð 1000 krónum í Listasafninu á Akureyri. Kemur þessi breyting til að mestu vegna hækkunar á þjónustukostnaði vegna mikillar fjölgunar erlendra gesta yfir sumartímann. Gestir fá aðgöngumiða í hendurnar við greiðslu sem gildir á sýningar Listasafnsins sem og Listasafnsins, Ketilhúss.

Laugardaginn 21. maí kl. 15 verður opnuð sýningin Arkitektúr og Akureyri í Listasafninu á Akureyri, Ketilhúsi. Á sýningunni er byggingarlist á Akureyri skoðuð í víðu samhengi og fjallað um byggingar sem ýmist hafa unnið í samkeppnum eða hlotið sérstakar viðurkenningar. Í amstri dagsins vill oft gleymast að hlutir og byggingar þess manngerða umhverfis sem við lifum og hrærumst í voru upphaflega hugmynd sem kviknaði í huga einhverrar manneskju. Sköpunarverk sem birtast okkur fullmótuð byrjuðu öll sem lítil hugmynd.

Miðvikudaginn 18. maí og fimmtudaginn 19. maí kl. 12.15-12.45 verður boðið upp á leiðsögn í Listasafninu á Akureyri um ljósmyndasýninguna Fólk / People, en þar sýna sjö ólíkir listamenn verk sín. Fyrri leiðsögnin er haldin í tilefni af Alþjóðlega safnadeginum og fer eingöngu fram á ensku, en hin síðari verður með hefðbundnu sniði og á íslensku. Þorbjörg Ásgeirsdóttir safnfulltrúi og Guðrún Pálína Guðmundsdóttir fræðslufulltrúi fræða gesti um sýninguna sem lýkur 29. maí næstkomandi og er því um síðustu leiðsögnina að ræða. Aðgangur er ókeypis.