Opnanir á Akureyrarvöku

Komdu og upplifðu kyrrð, undrun og fegurð þar sem list og náttúra mætast í mjúku kvöldljósi.

Opnun föstudagskvöldið 28. ágúst við setningu Akureyrarvöku í Lystigarðinum og laugardaginn 29. ágúst við opnun þriggja sýninga í Listasafninu á Akureyri.

 

 

Þrír listamenn mætast á samsýningu og vinna með náttúruna sem efnivið, innblástur og samtal. Páll á Húsafelli mótar verk sín í stein og málar á svell, efni sem bera með sér sögur landsins og anda þess sem býr í hverjum æðastreng og steinblæ. Lene Zachariassen, norsk að uppruna en búsett á Íslandi, vinnur í samhljómi við náttúruleg efni þar sem mjúkir þræðir og áferð verða að samtali milli handar og lífræns efnis. Í myndbandi Maríu Tórgarð við tónlist &Bartal fléttast hreyfing, hljóð, vatn og ljós í ljóðræna hugleiðingu um tilvist og uppruna.

Öll þrjú vinna með anda náttúrunnar af djúpri næmni og virðingu. Í sameiningu skapa þau bæði sýnilega og ósýnilega tengingu við náttúruna, en ekki síst viðkvæma og lifandi minningu um hvernig listin getur brúað bilið milli mannsins og umheimsins – á milli landa, ólíkra menningarheima og umhverfis.

Sýningarstjóri: Þórarinn Blöndal

Hversdagsland

Baldvin Ringsted (f. 1974) er fæddur og uppalinn á Akureyri, en býr og starfar í Skotlandi. Hann vinnur með ýmis efni og miðla, þ.m.t. málverk, prent, skúlptúra og vídeó. Baldvin lauk mastersgráðu frá Glasgow School of Art í Skotlandi 2007 og nam þar áður við Myndlistaskólann á Akureyri og Lahti Polytechnic School of Art í Finnlandi. Hann hefur sýnt verk sín víða um heim og hlaut nýlega verðlaun frá The Scottish Landscape Awards.

Á þessari sýningu vinnur Baldvin með nýja seríu þar sem hann notar fundin útsaumsverk til að skapa nýtt landslag. Hann hefur heillast af „vúdúkrafti“ hversdagslegra hluta og hvernig þeir bera með sér þunga minninga. Í hverju fundnu verki felast gleymdar minningar úr húsum sem hafa gengið í arf, verið seld eða endurnýjuð. Baldvin setur þessi brot saman, gefur þeim nýtt líf og leyfir þeim að vaxa upp úr auðninni. Útkoman er ógnvekjandi, kunnuglegt – þó fjarlægt – og súrrealískt landslag.