Fréttasafn

Fyrirhuguðum Þriðjudagsfyrirlestri Heiðu Bjarkar Vilhjálmsdóttur um Kötu saumakonu, sem átti að fara fram þriðjudaginn 20. febrúar kl. 17 hefur verið frestað vegna óviðráðanlegra orsaka. Fyrirlesturinn mun þess í stað fara fram 2. apríl næstkomandi. Beðist er velvirðingar á þessari breytingu.

A! Gjörningahátíð kallar eftir gjörningum eða hugmyndum frá listafólki úr öllum listgreinum og öðrum sem hafa áhuga á þátttöku í hátíðinni, sem fram fer 10.-13. október næstkomandi og nú í tíunda sinn. Þátttakendur fá 80.000 krónur í þóknun fyrir þátttöku. Ferðakostnaður er ekki greiddur né tilfallandi kostnaður við verkin, en skipuleggjendur hvetja listafólk til þess að sækja um styrki í menningarsjóði.

Þriðjudaginn 13. febrúar kl. 17-17.40 heldur finnski textílhönnuðurinn Sanna Vatanen Þriðjudagsfyrirlestur undir yfirskriftinni Woolly Tales of a Textile Artist. Fyrirlesturinn fer fram á ensku og er aðgangur ókeypis.

Þriðjudaginn 6. febrúar kl. 17-17.40 heldur Ýr Jóhannsdóttir, textílhönnuður og myndlistarkona, fyrsta Þriðjudagsfyrirlestur ársins undir yfirskriftinni Kynning á verkefnum Ýrúrarí. Aðgangur er ókeypis.

Laugardaginn 3. febrúar kl. 15 verður boðið upp á listamannspjall með Guðnýju Kristmannsdóttur um sýningu hennar, Kveikja, sem var opnuð um síðastliðna helgi. Stjórnandi er Hlynur Hallsson, safnstjóri. Aðgöngumiði jafngildir aðgangi að listamannaspjalli.

Á kynningarfundi sem haldinn var í Listasafninu á Akureyri í gær var dagskrá ársins 2024, ný árbók og komandi starfsár kynnt. Einnig var tilkynnt um styrki frá Safnaráði og Listaverkasjóði Valtýs Péturssonar. Árbók safnsins er nú öllum aðgengileg og gjaldfrjáls í anddyri safnsins auk valdra staða á Akureyri.

Föstudaginn 26. janúar kl. 16-16.40 munu Sigga Soffía, listakona, og Þorbjörg Helga, leikkona, flytja gjörninginn Ég er blautur flugeldur í Ketilkaffi á jarðhæð Listasafnsins. Í gjörningnum mun Sigga Soffía flytja opnunareintal verksins Til hamingju með að vera mannleg og Þorbjörg Helga mun í framhaldinu flytja valin ljóð úr ljóðabók Siggu Soffíu sem ber sama titil. Special edition ljóðabækurnar verða til sýnis að gjörningi loknum.

Sunnudaginn 28. janúar kl. 11-12 mun Heiða Björk Vilhjálmsdóttir, fræðslufulltrúi, segja börnum og fullorðnum frá sýningu Sigurðar Guðjónssonar, Hulið landslag, og yfirlitssýningu á verkum Kötu saumakonu. Að lokinni leiðsögn er gestum boðið að búa til sitt eigið listaverk, innblásið af verkum listafólksins.

Laugardaginn 27. janúar kl. 15 verða þrjár sýningar opnaðar í Listasafninu á Akureyri: Alexander Steig – Steinvölur Eyjafjarðar, Guðný Kristmannsdóttir – Kveikja, og Sigurður Atli Sigurðsson – Sena. Boðið verður upp á listamannaspjall með Alexander Steig og Sigurði Atla kl. 15.45 og er stjórnandi Hlynur Hallsson, safnstjóri Listasafnsins. Haldið verður listamannaspjall með Guðnýju Kristmannsdóttur laugardaginn 3. febrúar kl. 15 og boðið upp á fjölskylduleiðsögn um sýningarnar þrjár sunnudaginn 24. mars kl. 11-12.

Um síðustu helgi fór fram í Listasafninu á Akureyri myndlistarvinnustofa í verkefninu Allt til enda. Selma Hreggviðsdóttir, myndlistarmaður, bauð börnum á aldrinum 6 til 9 ára að kynnast ferli listamannsins. Þátttakendur unnu bæði samvinnuverkefni og sjálfstæð verk. Áhersla var lögð á að skoða gaumgæfilega hluti sem fólk gefur ekki mikinn gaum í daglegu lífi. Hvaðan koma hlutir og hvaða hlutverki gegna þeir í lífi okkar? Er pizza bara pizza? Hvað er listsýning? Vinnustofan var óvissuferð þar sem þátttakendur sköpuðu og höfðu áhrif á framvindu og niðurstöðu verunnar saman í Listasafninu.