Fréttasafn

Þriðjudaginn 6. september kl. 17 í Listasafninu á Akureyri, Ketilhúsi heldur Norræni menningarsjóðurinn upplýsingafund. Þar fer Ása Richardsdóttir, fyrrum forseti Leiklistarsamband Íslands og sendiherra Norræna menningarsjóðsins, yfir norræna sjóðakerfið og möguleika á samstarfi og tengingum. Til að sækja um í sjóðunum þarf verkefnið að hafa sterka norræna tengingu.

Fimmtudaginn 1. september kl. 12.15-12.45 verður boðið upp á leiðsögn í Listasafninu á Akureyri um sýningu Gunnars Kr., Formsins vegna, sem var opnuð um síðustu helgi. Hlynur Hallsson og Gunnar Kr. taka á móti gestum og fræða þá um sýninguna. Aðgangur er ókeypis.

A! Gjörningahátíð verður haldin í annað sinn dagana 1. - 4. september 2016 í samvinnu Listasafnsins á Akureyri, LÓKAL alþjóðlegrar leiklistarhátíðar, Reykjavík Dance Festival, Menningarfélags Akureyrar / Leikfélags Akureyrar, Listhúss og Kynningarmiðstöðvar íslenskrar myndlistar. Á hátíðinni fremur myndlistar- og sviðslistafólk gjörninga og setur upp gjörningatengd verk.

Á Akureyrarvöku, laugardaginn 27. ágúst, verður nóg um að vera í Listasafninu og sýningar þess opnar til kl. 22. Dagskráin hefst kl. 10 um morguninn þegar Listasafnið, Ketilhús opnar á sínum hefðbundna sumartíma en þar stendur nú yfir sýningin Arkitektúr og Akureyri. Listakonurnar Jonna og Brynhildur Kristinsdóttir halda svo listasmiðju fyrir krakka á öllum aldri í tengslum við sýninguna, kl. 14.30-16.30. Byggingar úr pappír og af öllum stærðum og gerðum eru viðfangsefni smiðjunnar. Aðgangur ókeypis.

Laugardaginn 27. ágúst kl. 14.30-16.30 halda listakonurnar Jonna og Brynhildur Kristinsdóttir listasmiðju fyrir krakka á öllum aldri í tengslum við sýninguna Arkitektúr og Akureyri í Listasafninu, Ketilhúsi. Byggingar úr pappír og af öllum stærðum og gerðum eru viðfangsefni smiðjunnar. Aðgangur ókeypis.

Á Akureyrarvöku, laugardaginn 27. ágúst kl. 15, opnar Gunnar Kr. sýninguna Formsins vegna í Listasafninu á Akureyri. Myndlist Gunnars Kr. einkennist af slagkrafti og þunga sem birtist með fjölbreyttum hætti. Hann hefur t.d. teiknað biksvartar blýsólir og logskorið stálblóm. Undanfarin misseri hefur Gunnar notað fislétt og viðkvæmt hráefni til myndgerðar – pappír – sem hann mótar, sker, litar og raðar saman uns tilætluðum áhrifum er náð. Í spennunni milli formrænnar tjáningar listamannsins annars vegar og hráefnisins sem hann notar hins vegar, er feiknarleg orka. Verk Gunnars Kr. líkjast um margt náttúrunni sjálfri; þau eru sterk, form endurtaka sig og fegurðin ríkir – þótt hún sé á stundum ógnvekjandi. Kröftug en þó viðkvæm.

Fimmtudaginn 25. ágúst kl. 12.15-12.45 verður boðið upp á leiðsögn í Listasafninu á Akureyri, Ketilhúsi um sýninguna Arkitektúr og Akureyri, en sýningunni lýkur um komandi helgi. Haraldur Ingi Haraldsson, sýningarstjóri, tekur á móti gestum og fræðir þá um sýninguna. Aðgangur er ókeypis.

Fimmtudaginn 18. ágúst kl. 12.15-12.45 verður boðið upp á síðustu leiðsögnina um sýninguna Nautn / Conspiracy of Pleasure í Listasafninu. Hlynur Hallsson sýningarstjóri og Guðný Kristmannsdóttir listakona taka á móti gestum og fræða þá um sýninguna. Aðgangseyrir er 1.000 krónur og gildir jafnframt á sýninguna Arkitektúr og Akureyri í Listasafninu, Ketilhúsi. Nautn / Conspiracy of Pleasure lýkur næstkomandi sunnudag 21. ágúst en sýningin verður opin kl. 10-17 alla daga fram að lokun.

Alla fimmtudaga í sumar kl. 12.15-12.45 verður boðið upp á leiðsagnir í Listasafninu.

Fimmtudaginn 23. júní kl. 12.15-12.45 verður boðið upp á leiðsögn í Listasafninu, Ketilhúsi um sýninguna Arkitektúr og Akureyri. Guðrún Pálína Guðmundsdóttir fræðslufulltrúi tekur á móti gestum og fræðir þá um sýninguna.