Fréttasafn

Þriðjudagsfyrirlestur norska myndlistarmannsins Sigbjørn Bratlie, Foreign Languages, sem átti að fara fram þriðjudaginn 9. nóvember fellur niður vegna veikinda. Beðist er velvirðingar á þessari breytingu.

Þriðjudaginn 9. nóvember kl. 17-17.40 heldur norski myndlistarmaðurinn Sigbjørn Bratlie Þriðjudagsfyrirlestur í Listasafninu á Akureyri undir yfirskriftinni Foreign languages. Þar mun hann tala um listrannsóknir þær er hann hefur stundað síðastliðinn níu ár og fjalla að mestu um „framandi tungumál“. Fyrirlesturinn fer fram á ensku.

Þriðjudaginn 2. nóvember kl. 17-17.40 heldur Kristinn Schram, dósent í þjóðfræði við Háskóla Íslands, Þriðjudagsfyrirlestur í Listasafninu á Akureyri undir yfirskriftinni Vísitasíur og vegalaust bjarnfólk. Þar mun hann fjalla um birtingarmyndir hvítabjarna í efnismenningu og frásögnum á Íslandi.

Laugardaginn 30. október kl. 15.00-15.15 og kl. 16.00-16.15 frumflytur ítalski gítarleikarinn Daniele Basini verk sitt Lettere fyrir einleiksgítar í sal 04 í Listasafninu. Tónleikarnir eru liður í tónleikaröðinni Tólf tóna kortérið sem unnið er í samstarfi við Tónlistarskólann á Akureyri og er aðgangur ókeypis.

Laugardaginn 30. október kl. 11-12 verður boðið upp á listsmiðju fyrir börn og fullorðna í Listasafninu á Akureyri. Smiðjan er haldin í samstarfi við Listasafn ASÍ í tengslum við útkomu bókar Gísla Pálssonar um örlög geirfuglsins, Fuglinn sem gat ekki flogið. Umsjón hefur Jonna – Jónborg Sigurðardóttir, myndlistarmaður. Enginn aðgangseyrir er að smiðjunni sem er styrkt af SSNE.

Fyrsta rafræna smiðja Listasafnsins fór í loftið í september síðastliðnum undir yfirskriftinni Sköpun utan línulegrar dagskrár. Verkefnið felst í því að bjóða börnum og þeirra nánustu að taka þátt í listsmiðju á þeim tíma sem þeim hentar best. Smiðjan er tekin upp í Listasafninu og sýnd á netinu, þannig geta þátttakendur horft á smiðjurnar heima hjá sér og unnið verk. Afrakstur fyrri listsmiðju verkefnisins er nú til sýnis í fræðslurýmis Listasafnsins og stendur til 14. nóvember næstkomandi. Það var hönnuðurinn Sigrún Björg Aradóttir sem kenndi fjölskyldum að gera sinn eigin draumafangara.

Þriðjudaginn 26. október kl. 17-17.40 heldur Rán Flygenring, teiknari, Þriðjudagsfyrirlestur í Listasafninu á Akureyri undir yfirskriftinni Listin að móðga, gleðja og greina með teikningum. Þar segir hún frá ferli sínum í námi og starfi allt frá því að hún hélt fyrst á blýanti og til dagsins í dag. Við sögu kemur hirðteiknari Reykjavíkurborgar, myndlýsingar bóka, lundahótel- og búðarekstur, málun gangna, hraðráðstefnuteikning og nokkur ráð um hvernig megi ferðast endalaust og ekki eignast klósettbursta. Í lok fyrirlesturs svarar Rán spurningum sem kunna að brenna á áhorfendum.

Önnur rafræna smiðja Listasafnsins undir yfirskriftinni Sköpun utan línulegrar dagskrár er nú komin í loftið og er að þessu sinni danslistasmiðja í umsjón Urðar Steinunnar Önnudóttur Sahr, dansara og danskennara. Verkefnið felst í að bjóða fjölskyldum að taka þátt í rafrænni danslistasmiðju. Í samvinnu við sína nánustu fá börn tækifæri til að skapa sitt eigið dansverk óháð stað og stund.

Laugardaginn 23. október kl. 11-12 verður haldin ljósmyndasmiðja í Listasafninu fyrir alla aldurshópa. Umsjón hefur Sigurður Mar, ljósmyndari. Þátttakendur eru beðnir um að hafa símana meðferðis þar sem smiðjan byggir á myndatöku með símum. Aðgangur er ókeypis. Sérstakur styrktaraðili smiðjunnar er SSNE.

Fyrirhuguðum Þriðjudagsfyrirlestri sem Alma Dís Kristinsdóttir, safnstjóri Listasafns Einars Jónssonar, átti að halda þriðjudaginn 19. október hefur verið frestað. Fyrirlesturinn mun þess í stað fara fram þriðjudaginn 16. nóvember.