Fréttasafn

Á kynningarfundi sem haldinn var í Listasafninu á Akureyri í dag var dagskrá ársins 2019, nýr ársbæklingur og komandi starfsár kynnt. Einnig var farið yfir þá breyttu starfsemi sem nú er í safninu eftir opnun nýrra salarkynna í ágúst á síðasta ári. Í lok fundarins var undirritaður nýr samstarfssamningur Listasafnsins og Norðurorku. Hlynur Hallsson, safnstjóri Listasafnsins, og Helgi Jóhannesson, forstjóri Norðurorku, undirrituðu samninginn. Prentaðri dagskrá ársins var í dag dreift í öll hús á Akureyri.

Þriðjudaginn 5. febrúar kl. 17-17.30 heldur Tumi Magnússon, myndlistarmaður, Þriðjudagsfyrirlestur í Listasafninu á Akureyri, Ketilhúsi undir yfirskriftinni Nokkur verk frá síðustu 20 árum. Þar mun hann fjalla um bakgrunn og tilurð nokkurra verka sinna frá síðustu 20 árum sem unnin voru með ólíkum miðlum.

Listasafnið á Akureyri efnir til sýningar á verkum eftir norðlenska myndlistarmenn 18. maí - 29. september 2019. Dómnefnd velur úr innsendum verkum listamanna sem búa og/eða starfa á Norðurlandi eða hafa tengingu við svæðið. Umsóknarfrestur er til og með 15. mars næstkomandi.

Þriðjudaginn 29. janúar kl. 17-17.30 heldur Auður Ösp Guðmundsdóttir, vöru- og leikmyndahönnuður, fyrsta Þriðjudagsfyrirlestur ársins í Listasafninu á Akureyri, Ketilhúsi undir yfirskriftinni „Og mig sem dreymdi alltaf um að verða uppfinningamaður“. Þar mun hún tala um námsárin í Listaháskóla Íslands, þau ólíku verkefni sem falla undir vöruhönnun og vinnu sína hjá Leikfélagi Akureyrar og við sýninguna Kabarett.

Yfirlitssýningu á verkum Arnar Inga Gíslasonar, Lífið er LEIK-fimi, lýkur næstkomandi sunnudag. Sýningin hefur verið skipulagður gjörningur síðasliðna þrjá mánuði um framleiðslu bókar um listamanninn Örn Inga. Bókin er nú komin á lokastig og verður kynnt á málþingi á laugardaginn. Eins og undanfarna þrjá mánuði verður stútfull dagskrá í þessari viku tengd sýningunni.

Laugardaginn 9. febrúar kl. 15 verða fyrstu tvær sýningar ársins opnaðar í Listasafninu: sýning Tuma Magnússonar, Áttir, og samsýning Margrétar Jónsdóttur og Kristínar Gunnlaugsdóttur, SuperBlack.

Fimmtudaginn 17. janúar kl. 16-16.30 verður boðið upp á leiðsögn um sýningu Hjördísar Frímann og Magnúsar Helgasonar, Hugmyndir.

Á þrettándanum, sunnudaginn 6. janúar, kl. 15 mun Petrea Óskarsdóttir leika fimm smáverk fyrir þverflautu sem sérstaklega eru valin út frá jafnmörgum myndverkum Arnar Inga á sýningunni Lífið er LEIK-fimi. Tónskáldin eru frá ólíkum tímum og koma frá ólíkum heimshornum; Johann Sebastian Bach, Kazuo Fukushima, Claude Debussy, Arthur Honegger og Kolbein Bjarnason.

Listasafnið á Akureyri óskar landsmönnum gleðilegra jóla og farsældar á komandi ári með þökk fyrir samskiptin á árinu sem er að líða.

23.12, Þorláksmessa: Kl. 12-22, enginn aðgangseyrir. 24.12 / 25.12: Lokað. 26.-30: Kl. 12-17. 31.12 /01.01: Lokað.