Fréttasafn

Föstudaginn 28. desember kl. 15 fjallar Halldór Sánchez fjallar um hugtakið „Myndlist sem mál“ sem var viðfangsefni M.ed. verkefnisins hans 2017. Sem hluti af verkefninu tók hann viðtal við afa sinn, Örn Inga, til þess að fá innsýn í aðferðirnar sem hann notaði í tengslum við listavikurnar sem hann skipulagði um land allt og tók þátt í og líka til að hlusta á hann skýra út hvaða merkingu hann lagði í hugtakið „sköpun“.

Miðvikudaginn 19. desember kl. 16 spila nokkrir af eldri nemendum Tónlistarskólans á Akureyri jólalög ásamt kennara sínum Petreu Óskarsdóttur í Listasafninu. Flutningurinn er hluti af yfirlitssýningu á verkum Arnar Inga, Lífið er LEIK-fimi.

Til að minnast Friðþjófs Nansen býður Háskólinn á Akureyri gestum og gangandi að hlýða á kveðjuerindi Gunhild Hoogensen Gjørv í Listasafninu, Ketilhúsi þriðjudaginn 18. desember kl. 16-17.

Laugardaginn 15. desember kl. 18 verður Jólaball Snorra Ásmundssonar á Listasafninu, Ketilhúsi. Það verður sannkölluð jólastemning og kallað verður á jólaandann eins og Snorra er einum lagið. Verið velkomin.

Kvikmyndin Gildran eftir Örn Inga Gíslason, sem var frumsýnd 17. júní 2002, verður sýnd á Listasafninu 15. og 16. desember kl. 15.00.

Sunnudaginn 9. desember kl. 13 fjallar Æsa Sigurjónsdóttir, sýningarstjóri, um Ange Leccia og sýningu hans La Mer / The Sea / Hafið. Viðburðurinn fer fram í Gili kaffihúsi. Enginn aðgangseyrir.

Laugardaginn 8. desember kl. 16 fjallar Signý Pálsdóttir, fyrrum leikhússtjóri Leikfélags Akureyrar, um Örn Inga og leikmyndirnar sem hann gerði fyrir Leikfélagið undir hennar stjórn. Þar á meðal er leikmyndin fyrir leikritið Ég er gull og gersemi eftir Svein Einarsson með tónlist eftir Atla Heimi Sveinsson sem fjallaði um Sölva Helgason. Verkið, sem var að hluta til byggt á Sólon Íslandus eftir Davíð Stefánsson, vakti mikla athygli og var sett upp í Norðurlandahúsinu í Færeyjum. Petrea Óskarsdóttir þverflautuleikari mun leika tónlist Atla Heimis, en mörg sönglaganna eru vel þekkt eins og Kvæðið um fuglana.

Laugardaginn 8. desember kl. 15 verður opnuð sýning franska myndlistarmannsins Ange Leccia, La Mer / The Sea / Hafið, í Listasafninu, Ketilhúsi.

Í tilefni aldarafmælis fullveldisins bjóða fjórar rósir til veislu í Listasafninu laugardaginn 1. desember 2018 kl. 15.

Sunnudaginn 25. nóvember kl. 11-12 verður boðið upp á fjölskylduleiðsögn um sýningu Arnar Inga Gíslasonar "Lífið er Leik-fimi" í Listasafninu. Heiða Björk Vilhjálmsdóttir, fræðslufulltrúi, segir börnum og fullorðnum frá sýningunni. Að lokinni leiðsögn er gestum boðið að búa til sitt eigið listaverk, innblásið af verkum listamannsins. Aðgangur á fjölskylduleiðsögnina er ókeypis í boði Norðurorku.