Fréttasafn

Fimmtudaginn 12. apríl kl. 12.15-12.45 verður boðið upp á síðustu leiðsögnina um samsýninguna Sköpun bernskunnar 2018 og sýningu Bergþórs Morthens, Rof. Heiða Björk Vilhjálmsdóttir, fræðslufulltrúi, tekur á móti gestum og fræðir þá um sýningarnar, en þeim lýkur báðum næstkomandi sunnudag.

Laugardaginn 14. apríl kl. 11-12 verður boðið upp á fjölskylduleiðsögn í Listasafninu, Ketilhúsi. Heiða Björk Vilhjálmsdóttir, fræðslufulltrúi, segir börnum og fullorðnum frá samsýningunni Sköpun bernskunnar 2018 og sýningu Bergþórs Morthens, Rof.

Fimmtudaginn 5. apríl kl. 12.15-12.45 verður boðið upp á leiðsögn um samsýninguna Sköpun bernskunnar 2018 og sýningu Bergþórs Morthens, Rof. Heiða Björk Vilhjálmsdóttir, fræðslufulltrúi, tekur á móti gestum og fræðir þá um sýningarnar og einstaka verk. Aðgangur ókeypis.

Listasafnið, Ketilhús verður opið alla páskahátíðina kl. 12-17. Á skírdag og annan í páskum kl. 12.15-12.45 verður boðið upp á leiðsögn um samsýninguna Sköpun bernskunnar 2018 og sýningu Bergþórs Morthens, Rof. Aðgangur er ókeypis. Gleðilega páska!

Formleg vígsla og opnun stórbættra og aukinna salarkynna Listasafnsins á Akureyri fer fram á Akureyrarvöku 24.-25. ágúst næstkomandi. Þá sömu helgi verður 25 ára afmæli safnsins fagnað og fjórum dögum síðar á Akureyrarkaupstaður 156 ára afmæli.

Á dögunum úthlutaði mennta- og menningarmálaráðherra að fenginni umsögn safnaráðs alls 114.770.000 kr. úr safnasjóði. Þar af voru verkefnastyrkir alls 90.620.000 kr. til 88 verkefna, auk þess sem 24.150.000 kr. var úthlutað í rekstrarstyrki til 35 safna. Alls bárust 146 verkefnaumsóknir.

Þriðjudagsfyrirlestur þeirra Jeannette Castioni og Ólafar Guðmundssonar, Svipmyndir af samfélagi, sem átti að fara fram í dag kl. 17, fellur niður vegna óviðráðanlegra orsaka. Ný dagsetning verður auglýst síðar. Beðist er velvirðingar á þessari breytingu.

Laugardaginn 24. mars kl. 15 verður sýning Bergþórs Morthens, Rof, opnuð í Listasafninu, Ketilhúsi. Bergþór Morthens lauk námi við Myndlistaskólann á Akureyri 2004 og MA námi í myndlist við Valand háskólann í Gautaborg 2015. Hann hefur haldið einkasýningar á Íslandi, í Rúmeníu og Svíþjóð og tekið þátt í samsýningum á Íslandi, Grikklandi, í Svíþjóð og Danmörku.

Þriðjudaginn 20. mars kl. 17-17.40 halda myndlistarkonan Jeannette Castioni og leikarinn Ólafur Guðmundsson síðasta Þriðjudagsfyrirlestur vetrarins í Listasafninu, Ketilhúsi undir yfirskriftinni Svipmyndir af samfélagi.

Jenný Lára Arnórsdóttir leikstjóri, leikari og framleiðandi mun verkstýra Jónsmessuhátíð, Listasumri og Akureyrarvöku í samvinnu við Akureyrarstofu og Listasafnið á Akureyri. Jenný Lára var valin úr hópi 11 umsækjenda um stöðuna en hún útskrifaðist sem leikari og leikstjóri frá The Kogan Academy of Dramatic Arts í London árið 2012. Hún hefur starfað sem leikstjóri bæði hjá sjálfstæðum atvinnuleikhópum sem og áhugaleikhópum. Jenný Lára er meðlimur í leikhópnum Umskiptingar, sem er atvinnuleikhópur sem starfar á Norðurlandi en hún sá um framleiðsluna á fyrsta verki þeirra Framhjá rauða húsinu og niður stigann. Einnig leikstýrði hún og framleiddi gamanóperuna Piparjúnkan og þjófurinn sem sýnd var í Samkomuhúsinu á Akureyrarvöku 2017.