Fréttasafn

Þriðjudaginn 25. febrúar kl. 17-17.40 heldur Heiða Eiríksdóttir, tónlistarkona, Þriðjudagsfyrirlestur í Listasafninu á Akureyri, Ketilhúsi undir yfirskriftinni Forvitni og ímyndunarafl. Í fyrirlestrinum fjallar Heiða um hinar ýmsu aðferðir sem hún hefur notað í listsköpun sinni og vinnu í gegnum tíðina og hvernig forvitni og það að viðhalda henni getur haft jákvæð áhrif á sköpun. Hún hefur gítar með í för og tekur lagið, en fer líka yfir feril sinn og reynir að varpa örlitlu ljósi á það hvernig er að vera sjálfstætt starfandi listamaður á Íslandi.

Þriðjudaginn 18. febrúar kl. 17-17.40 heldur Snorri Ásmundsson, listamaður, Þriðjudagsfyrirlestur í Listasafninu á Akureyri, Ketilhúsi undir yfirskriftinni Lífsins listamaður. Þar mun hann fjalla um feril sinn í listinni og lífsreynslu.

Sunnudaginn 16. febrúar kl. 11-12 mun Heiða Björk Vilhjálmsdóttir, fræðslufulltrúi, segja börnum og fullorðnum frá alþjóðlegu samsýningunni Línur. Að lokinni leiðsögn er gestum boðið að búa til sitt eigið listaverk, innblásið af verkum listamannanna.

Í morgun var haldinn fundur í Listasafninu á Akureyri þar sem Akureyrarbær varð fyrsta sveitarfélagið á Íslandi til að hefja vegferð í átt að samfélagi sem er vinveitt og meðvitað um þarfir einstaklinga með heilabilun og aðstandendur þeirra (e. dementia friendly community). Listasafnið á Akureyri leggur sitt á vogaskálarnar og tekur mánaðarlega á móti fólki með heilabilun og veitir þeim leiðsögn og fræðslu um sýningar safnsins. Verkefnið er brýnt, enda má ætla að fjögur til fimm þúsund manns á Íslandi séu með heilabilunarsjúkdóm og má reikna með verulegri fjölgun samhliða hækkandi aldri þjóðarinnar.

Þriðjudaginn 11. febrúar kl. 17-17.40 heldur Marco Paoluzzo, ljósmyndari, Þriðjudagsfyrirlestur í Listasafninu á Akureyri, Ketilhúsi undir yfirskriftinni Ljósmyndun í 50 ár.Þar mun hann tala um rúmlega 50 ára feril sinn í ljósmyndum og varpa ljósi á áhrifavalda. Einnig mun hann fjalla um útgefnar bækur sínar sem og þær sem enn eru óútgefnar.

Þriðjudaginn 4. febrúar kl. 17-17.40 heldur Jón B. K. Ransu, myndlistarmaður, Þriðjudagsfyrirlestur í Listasafninu á Akureyri, Ketilhúsi undir yfirskriftinni Formleysa, úrkast og blendingsform.

Á kynningarfundi sem haldinn var í Listasafninu á Akureyri í dag var m.a. komandi starfsár, sýningaskrá ársins 2020 og nýtt kaffihús kynnt. Einnig var farið yfir starfsemi safnsins í heild sinni sem og áframhaldandi samstarf við Icelandair Hotel Akureyri. Í lok fundarins undirrituðu Hlynur Hallsson, safnstjóri, og Auðar B. Ólafsdóttir samning um rekstur kaffihúss í Listasafninu. Prentaðri dagskrá ársins var í dag dreift í öll hús á Akureyri.

Franska kvikmyndahátíðin á Akureyri hefst 13. febrúar næstkomandi. Listasafnið á Akureyri tekur þátt og býður upp á lokamynd hátíðarinnar, Picassoráðgátan / Le mystere Picasso eftir HG Clouzot, sunnudaginn 13. febrúar kl. 17.

Heimildarmynd um íslenska matarhefð og matarsögu verður sýnd í Listasafninu á Akureyri, sal 10, Ketilhúsi sunnudaginn 2. febrúar klukkan 15.00. Aðgangur er ókeypis.

Laugardaginn 1. febrúar verður alþjóðlega samsýningin Línur opnuð í Listasafninu á Akureyri. Á sýningunni koma saman átta listamenn frá sex ólíkum löndum og fjórum heimsálfum; Hong Kong, Litháen, Japan, Þýskalandi, Mexíkó og Túnis og „draga línur“. Línurnar verða til í gegnum ólík listform í þeim tilgangi að eiga samskipti við umheiminn. Sýningin tengir Ísland við fjarlæga og framandi menningarheima í gegnum myndlist. Hluti verkanna er staðbundinn, þ.e. unninn sérstaklega inn í rýmið í Listasafninu á Akureyri. Á meðal þess sem verður til í rýminu eru kontrapunktar þar sem verkin ýmist trufla eða bæta við hvert annað.