Fréttasafn

Næstkomandi laugardag, 2. nóvember, kl. 15 verður boðið upp á listamannaspjall með bæjarlistamanni Akureyrar 2018, Björgu Eiríksdóttur, um sýningu hennar Fjölröddun. Stjórnandi er Hlynur Hallsson. Aðgöngumiði á Listasafnið jafngildir aðgangi að listamannaspjalli.

Þriðjudaginn 29. október kl. 17-17.40 heldur Freyja Reynisdóttir, myndlistarmaður, Þriðjudagsfyrirlestur í Listasafninu á Akureyri undir yfirskriftinni Boltinn rúllar ef þú ýtir honum. Í fyrirlestrinum mun Freyja fjalla um þá ákvörðunartöku að starfa sem myndlistarkona að loknu listnámi og hvert sú ákvörðun hefur leitt hana. Einnig mun hún koma inn á margvísleg málefni eins og skapandi hugsun sem allra handa verkfæri, vinnustofur listamanna, umsjón og stofnun sýningarýma, listasmiðjur, viðburðarstjórnun, hugarfar, tækifæri, kulnun, brottflutninga, sjálfskoðun og hina eilífu endurkomu til listalífsins á Akureyri.

Laugardaginn 26. október kl. 15 færir Knut Eckstein sýningu sína, „ég hefenganáhuga á nokkrusemerstærraen lífið“ í endanlegt form með gjörningnum: »what curios of signs […] in this allaphbed! Can you rede […] its world?«1 [1] James Joyce, Finnegans Wake, London: Faber and Faber, S. 18, Zeilen 17-19

Þriðjudaginn 22. október kl. 17-17.40 heldur franska kvikmyndagerðarkonan Natalie Saccu de Franchi Þriðjudagsfyrirlestur í Listasafninu á Akureyri undir yfirskriftinni "Fátt eitt verður mér að veruleika...".

A! Gjörningahátíð var haldin í fimmta sinn á Akureyri dagana 10. - 13. október og sáu yfir 1.500 áhorfendur þá gjörninga sem í boði voru. A! var að venju með alþjóðlegum blæ enda komu erlendir listamenn sérstaklega til landsins til að taka þátt í hátíðinni. Alls voru listamennirnir 28, af 8 þjóðernum og gjörningarnir alls 20.

Arkitektastofan Kurt og Pí er tilnefnd til Hönnunarverðlauna Íslands 2019 fyrir hönnun viðbyggingar við Listasafnið á Akureyri.

Þriðjudaginn 15. október kl. 17-17.40 heldur Arndís Bergsdóttir, safnafræðingur, Þriðjudagsfyrirlestur í Listasafninu á Akureyri undir yfirskriftinni Listasafnið og Akureyri. Í fyrirlestrinum fjallar hún um samverkandi áhrif safna og samfélaga. Sérstöku ljósi verður beint að Listasafninu á Akureyri og hvernig hugmyndin um listasafn er samofin sérkennum samfélagsins og almennri samfélagsþróun.

Þriðjudaginn 8. október kl. 17-17.40 heldur Halldóra Helgadóttir, myndlistarkona, Þriðjudagsfyrirlestur í Listasafninu á Akureyri undir yfirskriftinni Á bakvið málverk. Í fyrirlestrinum mun hún fjalla um feril sinn í myndlistinni og einstaka verk.

A! Gjörningahátíð fer fram á Akureyri dagana 10. - 13. október næstkomandi. A! er fjögurra daga alþjóðleg gjörningahátíð sem haldin er árlega og er nú haldin í fimmta sinn. Ókeypis er inn á alla viðburði hátíðarinnar. Hátíðin er samvinnuverkefni Listasafnsins á Akureyri, Menningarhússins Hofs, Leikfélags Akureyrar, LÓKAL alþjóðlegrar leiklistarhátíðar og Gilfélagsins. Samhliða A! fer vídeólistahátíðin Heim fram auk viðburða utan dagskrár (off venue). Hátt í 2000 gestir hafa sótt hátíðina hverju sinni og notið líflegra gjörninga.

Laugardaginn 5. október kl. 15 verða fjórar sýningar opnaðar í Listasafninu á Akureyri: Björg Eiríksdóttir, Fjölröddun, Halldóra Helgadóttir, Verkafólk, Knut Eckstein, „ég hefenganáhuga á nokkrusemerstærraen lífið“ og samsýningin Síðasta Thule. Á opnun flytur sönghópurinn Arctic Opera tónlist frá endurreisnartímabilinu og Bruno Aloi (formaður ICCC) og Finnur Friðriksson (dósent við HA) flytja erindi.