Fréttasafn

Laugardaginn 13. júní kl. 14 og 16.30 verður boðið uppá tónlistardagskrá í Listasafninu á Akureyri, Ketilhúsi þar sem Lára Sóley og Hjalti Jónsson munu flytja efni af vögguljóðaplötunni Draumahöll sem er nýútkomin. Lára leikur á fiðlu og syngur, en Hjalti leikur á gítar. Flutt verður blanda af íslenskum og erlendum lögum, þar af þrjú ný lög og textar.

Dagskrá Listasumars á Akureyri 2015 kom út í dag og var dreift í hvert hús á Akureyri og víðar. Listasumar hefst föstudaginn 12. júní, kl. 17 og stendur yfir til 6. september. Á opnuninni mun Hlynur Hallsson safnstjóri Listasafnsins á Akureyri segja nokkur vel valinn orð, umvafinn handverki kvenna, sem mun prýða Listagilið. Í framhaldinu taka við tvennir tónleikar; annars vegar mun Þjóðlistahátiðin Vaka bjóða upp á síðdegistóna í Deigluna og hins vegar er gestum og gangandi boðið að taka þátt í Tilraunakenndum sólarhring undir merkjum tón- og myndlistarhátíðarinnar Yms, frá kl. 18 til 18.

Fyrr í dag komu starfsmenn Slökkviliðsins á Akureyri í Listagilið og þrifu malbikið. Til stendur að mála götuna alls konar myndum í tilefni af opnun Listasumars á föstudaginn kl. 17. Þeir listamenn sem taka þátt í vinnunni eru Þóra Karlsdóttir, Dagrún Matthíasdóttir, Almar Alfreðsson, Jonna og Jónína Björg Helgadóttir. Áhugasamir geta komið við í Listagilinu og fylgst með gangi mála.

Listasumar á Akureyri hefst með pompi og prakt á morgun, föstudaginn 12. júní, kl. 17 og stendur yfir til 6. september. Listasumar var umgjörð fyrir listviðburði á Akureyri í tæpa tvo áratugi, sem og vettvangur fyrir listamenn til að koma sér á framfæri. Það verður nú endurvakið með svipuðum áherslum.

Fimmtudaginn 11. júní, kl. 12.15-12.45, verður boðið upp á síðustu leiðsögnina um Sköpun bernskunnar í Listasafninu, Ketilhúsi, en sýningunni lýkur næstkomandi sunnudag 14. júní. Guðrún Pálína Guðmundsdóttir, safnkennari og sýningarstjóri tekur á móti gestum og fræðir þá um sýninguna og einstaka verk.

Fimmtudaginn 4. júní, kl. 12.15-12.45 verður boðið upp á leiðsögn í Listasafninu á Akureyri um útskriftarsýningu Myndlistaskólans á Akureyri, Sjónmennt 2015. Guðrún Pálína Guðmundsdóttir fræðslufulltrúi og nokkrir útskriftarnemar taka á móti gestum og fræða þá um sýninguna og einstaka verk.

Listasafnið á Akureyri mun halda barnanámskeið í tengslum við sýninguna Sköpun bernskunnar dagana 9. til 12. júní næstkomandi undir yfirskriftinni: Skynjun, hreyfing, teikning.

Darja Štirn, master í kennslufræðum hjá Vodmat-leikskólanum í Ljubljana, Sloveníu heldur fyrirlestur á vegum Háskólans á Akureyri og Listasafnsins á Akureyri. Listasafnið á Akureyri, Ketilhús, fimmtudaginn 28. maí kl 16:15.

Fimmtudaginn 28. maí, kl. 12.15-12.45 verður boðið upp á leiðsögn í Listasafninu á Akureyri, Ketilhúsi um sýninguna Sköpun bernskunnar. Guðrún Pálína Guðmundsdóttir, safnkennari og sýningarstjóri tekur á móti gestum og fræðir þá um sýninguna og einstaka verk.

Í mars síðastliðnum auglýsti Listasafnið á Akureyri eftir umsóknum um þátttöku í haustsýningu safnsins sem stendur yfir dagana 29. ágúst - 18. október 2015. Forsenda umsóknar er að sýnendur/listamenn búi og/eða starfi á Norðurlandi eða hafa tengingu við svæðið. Alls barst 91 umsókn og mun sérstaklega skipuð dómnefnd velja úr þeim verk á sýninguna. Dómnefndina skipa Aðalheiður S. Eysteinsdóttir myndlistarkona, Alice Liu myndlistarkona og rekstraraðili gestavinnustofanna Listhúss á Ólafsfirði, Arndís Bergsdóttir hönnuður og doktorsnemi í safnafræði, Hlynur Hallsson myndlistarmaður og safnstjóri Listasafnsins á Akureyri og Ólöf Sigurðardóttir forstöðukona Hafnarborgar menningar– og listamiðstöðvar Hafnarfjarðar.