Fréttasafn

A! Gjörningahátíð hófst í gærkvöldi í Deiglunni með gjörningi Árna Vil og Lísöndru Týru Jónsdóttur, Mötuð. Að honum loknum tóku við gjörningar Marte Dahl, Paper Cut, og Áka Frostasonar og Andro Manzoni, Takovo je Vrime, sem fram fóru í Listasafninu. A! er fjögurra daga alþjóðleg gjörningahátíð sem haldin er árlega, nú í ellefta sinn, og stendur fram á sunnudag. Ókeypis er inn á alla viðburði.

Dekurleiðsögn á laugardaginn kl. 16 í tilefni Dekurdaga á Akureyri. Sigríður Örvarsdóttir, safnstjóri, tekur á móti gestum og fræðir þá um sýningar Bergþórs Morthens – Öguð óreiða, Barbara Long – Himnastigi, Óla G. Jóhannssonar – Lífsins gangur og Sigurds Ólasonar – DNA afa. Happy hour og bleikir kokteilar á Ketilkaffi. Aðgangur er ókeypis.

Þriðjudaginn 7. október kl. 16.15 heldur Guðmundur Ármann Sigurjónsson, myndlistarmaður, Þriðjudagsfyrirlestur í Listasafninu á Akureyri undir yfirskriftinni Óli G. – Rómantíski expressíónistinn. Þar mun hann fjalla um myndlistarferil Óla G. Jóhannsson og gera tilraun til að varpa ljósi á hversu mikilvægt það er fyrir listamanninn að samfélagið sé tilbúið að taka á móti honum og listinni. Aðgangur er ókeypis.

A! Gjörningahátíð fer fram á Akureyri 9.-12. október næstkomandi. A! er fjögurra daga alþjóðleg gjörningahátíð sem haldin er árlega, nú í ellefta sinn, og er ókeypis inn á alla viðburði.

Önnur vinnustofa í verkefninu Allt til enda fer fram dagana 11. og 12. október næstkomandi. Þá mun Örn Alexander Ámundason, myndlistarmaður, bjóða börnum í 7.-10. bekk að skoða sögu gjörningalistar og gera spennandi tilraunir með miðilinn. Aðgangur er ókeypis.

Tólf tóna kortérið hefst á nýjan leik í Listasafninu á Akureyri næstkomandi laugardag, 4. október, kl. 15-15.15 og kl. 16-16.15. Þá mun lettneska listakonan Diana Sus frumflytja eigið spunaverk, Glit sálarinnar. Sus er þverfagleg listakona frá Lettlandi sem útskrifaðist úr skapandi deild Tónlistarskóla Akureyrar vorið 2020. Hún blandar gjarnan saman tónlist, ljóðum og leiklist og er þekkt fyrir indie-pop kvennabandið sitt Sus Dungo, sem hún lýsir sem blöndu af indie, kvikmyndatónlist og frelsi. Aðgangur er ókeypis.

Þriðjudaginn 30. september kl. 16.15 heldur Kristján Ingimarsson fyrsta Þriðjudagsfyrirlestur haustsins í Listasafninu á Akureyri undir yfirskriftinni Tilurð Femina Fabula. Þar mun hann fjalla um sýndarveruleika innsetninguna Femina Fabula, sem nú stendur yfir í Listasafninu, listrænt samstarf og vinnuaðferðir. Aðgangur er ókeypis.

Laugardaginn 27. september kl. 15 verða fimm sýningar opnaðar í Listasafninu á Akureyri: Óli G. Jóhannsson – Lífsins gangur, Bergþór Morthens – Öguð óreiða, Barbara Long – Himnastigi, Sigurd Ólason – DNA afa og sýndarveruleika innsetningin Femina Fabula. Á opnun verður boðið upp á listamannaspjall með Bergþóri Morthens og Barbara Long auk þess sem Kristján Ingimarsson verður með kynningu á Femina Fabula.

Mánudaginn 29. september kl. 16-18 verður boðið upp á tilraunakennda og skapandi vinnustofu með bresku myndlistarkonunni og meðferðaraðilanum Barbara Long. Vinnustofan ber yfirskriftina The Cloth that Binds og fer fram á ensku. Aðeins er pláss fyrir 12 fullorðna og er þátttökugjaldið 8.000 kr. Skráning fer fram á heida@listak.is.

Laugardaginn 20. september kl. 15 verður boðið upp á almenna leiðsögn um sýningar James Merry, Nodens, Sulis & Taranis, og Ýmis Grönvold, Milli fjalls og fjöru. Jafnframt verður fjölskylduleiðsögn um sýningarnar í boði daginn eftir, sunnudaginn 21. september kl. 11-12. Aðgangur að almennu leiðsögninni er innifalinn í aðgöngumiða á safnið, en aðgangur að fjölskylduleiðsögninni er ókeypis í boði Norðurorku og að henni lokinni er gestum boðið að búa til sitt eigið listaverk, innblásið af verkum sýninganna.