Fréttasafn

Fyrsta rafræna smiðja Listasafnsins fór í loftið í september síðastliðnum undir yfirskriftinni Sköpun utan línulegrar dagskrár. Verkefnið felst í því að bjóða börnum og þeirra nánustu að taka þátt í listsmiðju á þeim tíma sem þeim hentar best. Smiðjan er tekin upp í Listasafninu og sýnd á netinu, þannig geta þátttakendur horft á smiðjurnar heima hjá sér og unnið verk. Afrakstur fyrri listsmiðju verkefnisins er nú til sýnis í fræðslurýmis Listasafnsins og stendur til 14. nóvember næstkomandi. Það var hönnuðurinn Sigrún Björg Aradóttir sem kenndi fjölskyldum að gera sinn eigin draumafangara.

Þriðjudaginn 26. október kl. 17-17.40 heldur Rán Flygenring, teiknari, Þriðjudagsfyrirlestur í Listasafninu á Akureyri undir yfirskriftinni Listin að móðga, gleðja og greina með teikningum. Þar segir hún frá ferli sínum í námi og starfi allt frá því að hún hélt fyrst á blýanti og til dagsins í dag. Við sögu kemur hirðteiknari Reykjavíkurborgar, myndlýsingar bóka, lundahótel- og búðarekstur, málun gangna, hraðráðstefnuteikning og nokkur ráð um hvernig megi ferðast endalaust og ekki eignast klósettbursta. Í lok fyrirlesturs svarar Rán spurningum sem kunna að brenna á áhorfendum.

Önnur rafræna smiðja Listasafnsins undir yfirskriftinni Sköpun utan línulegrar dagskrár er nú komin í loftið og er að þessu sinni danslistasmiðja í umsjón Urðar Steinunnar Önnudóttur Sahr, dansara og danskennara. Verkefnið felst í að bjóða fjölskyldum að taka þátt í rafrænni danslistasmiðju. Í samvinnu við sína nánustu fá börn tækifæri til að skapa sitt eigið dansverk óháð stað og stund.

Laugardaginn 23. október kl. 11-12 verður haldin ljósmyndasmiðja í Listasafninu fyrir alla aldurshópa. Umsjón hefur Sigurður Mar, ljósmyndari. Þátttakendur eru beðnir um að hafa símana meðferðis þar sem smiðjan byggir á myndatöku með símum. Aðgangur er ókeypis. Sérstakur styrktaraðili smiðjunnar er SSNE.

Fyrirhuguðum Þriðjudagsfyrirlestri sem Alma Dís Kristinsdóttir, safnstjóri Listasafns Einars Jónssonar, átti að halda þriðjudaginn 19. október hefur verið frestað. Fyrirlesturinn mun þess í stað fara fram þriðjudaginn 16. nóvember.

Laugardaginn 16. október kl. 15.00-15.15 og kl. 16.00-16.15 frumflytur Petrea Óskarsdóttir nýtt verk eftir Sunnu Friðjónsdóttur fyrir flautu og rafhljóð, sem er sérstaklega samið fyrir Tólf tóna kortérið. Petrea leikur einnig verkið Spor eftir Karólínu Eiríksdóttur fyrir altflautu. Aðgangur er ókeypis.

Sunnudaginn 17. október kl. 11-12 verður boðið upp á fjölskylduleiðsögn í Listasafninu, en þá mun Heiða Björk Vilhjálmsdóttir, fræðslufulltrúi, segja börnum og fullorðnum frá sýningum Heklu Bjartar Helgadóttur, Villiljóð, og Ragnars Kjartanssonar, Undirheimar Akureyrar. Að lokinni leiðsögn er gestum boðið í skemmtilegan leik.

Þriðjudaginn 12. október kl. 17-17.40 heldur Þórður Sævar Jónsson, skáld, Þriðjudagsfyrirlestur í Listasafninu á Akureyri undir yfirskriftinni Brunagaddur og Brautigan. Þar mun hann lesa upp úr ljóðabók sinni Brunagaddur, sem kom út fyrr á þessu ári og fjallar um hans fyrsta vetur á Akureyri í 22 ár, og segja frá tilurð ljóðanna. Einnig mun hann lesa úr tveimur þýðingum sínum á verkum bandaríska rithöfundarins Richard Brautigan, ljóðabókinni 30sti júní/30sti júní og skáldsögunni Willard og keilubikararnir hans, og ræða höfundinn og verkin.

A! Gjörningahátíð hefst næstkomandi fimmtudag kl. 20 í Listasafninu og stendur til sunnudags. A! er fjögurra daga alþjóðleg gjörningahátíð sem haldin er árlega og nú í sjöunda sinn. Ókeypis er inn á alla viðburði.

Þriðjudaginn 5. október kl. 17-17.40 heldur myndlistarmaðurinn Nandor Angstenberger Þriðjudagsfyrirlestur í Listasafninu á Akureyri undir yfirskriftinni Magic Of Things. Fyrirlesturinn fer fram á ensku og er aðgangur er ókeypis.