Fréttasafn

Á kynningarfundi sem haldinn var í Listasafninu á Akureyri í gær var dagskrá ársins 2022, ný árbók og komandi starfsár kynnt. Einnig var undirritaður nýr samstarfssamningur við Norðurorku og skrifuðu Hlynur Hallsson, safnstjóri, og Gunnur Ýr Stefánsdóttir, verkefnastjóri, undir samninginn. Árbók safnsins er nú öllum aðgengileg og gjaldfrjáls í anddyri safnsins auk valdra staða á Akureyri og víðar.

Sunnudaginn 6. febrúar kl. 15 verður listamannaspjall með Karli Guðmundssyni og Erlingi Klingenberg í Listasafninu á Akureyri. Þar mun Hlynur Hallsson, safnstjóri, ræða við þá um sýningar þeirra, Lífslínur og punktur, punktur, punktur, sem lýkur síðar sama dag. Einnig munu Friðrik Þór Friðriksson, leikstjóri, og Vilborg Einarsdóttir, framleiðandi, ræða um heimildarmyndina um Karl, Dansandi línur, sem nú er í framleiðslu. Undirbúningur og handritsskrif myndarinnar hófust 2019 og listrænar tökur fóru fram 2020 og aftur síðastliðið sumar undir stjórn Örnu Valsdóttur, sem er listrænn stjórnandi myndarinnar

Sunnudaginn 6. febrúar kl. 11-12 verður boðið upp á fjölskylduleiðsögn í Listasafninu, en þá mun Heiða Björk Vilhjálmsdóttir, fræðslufulltrúi, segja börnum og fullorðnum frá sýningu Karls Guðmundssonar, Lífslínur. Að lokinni leiðsögn er gestum boðið að búa til sitt eigið listaverk, innblásið af verkum listamannsins.

Þriðjudaginn 1. febrúar kl. 17-17.40 heldur Jónína Björg Helgadóttir, myndlistarmaður, fyrsta Þriðjudagsfyrirlestur ársins undir yfirskriftinni Tveir pólar. Þar mun hún fjalla um feril sinn í myndlistinni, einræna íhugun á vinnustofunni og hraða samvinnu ólíkra listamanna.

Laugardaginn 29. Janúar kl. 12-17 verður fyrsta sýning ársins, Nánd / Embrace, opnuð í Listasafninu á Akureyri. Á sýningunni er athyglinni beint að innri rökfærslum listmálunar sem eru staðsettar, skuldbundnar og innbyggðar. Á sýningunni fellur allt saman í þeim tilgangi að skapa og miðla stöðum og aðstæðum fyrir málverk til að vera og verða – að anda inn og anda út, með áhorfandanum og staðnum. Markmiðið er að yfirgefa hugmyndina um fjarlægt hlutleysi og færa sig nær þátttökureynslu – hinni krefjandi en ánægjulegu leið frá aðskilnaði til nándar, frá fjarveru til þátttöku.

Framundan er síðasta vika sýninga Ann Noël, Teikn og tákn, og Bryndísar Snæbjörnsdóttur og Mark Wilson, Vísitasíur, en báðum sýningum lýkur næstkomandi sunnudag, 15. janúar.

Laugardaginn 29. janúar verður fyrsta sýning ársins, Embrace, opnuð í Listasafninu á Akureyri. Á sýningunni er athyglinni beint að innri rökfærslum listmálunar sem eru staðsettar, skuldbundnar og innbyggðar. Á sýningunni fellur allt saman í þeim tilgangi að skapa og miðla stöðum og aðstæðum fyrir málverk til að vera og verða – að anda inn og anda út, með áhorfandanum og staðnum.

Listasafnið á Akureyri óskar landsmönnum gleðilegra jóla og farsældar á komandi ári með þökk fyrir samskiptin á árinu sem er að líða.

Í tilefni jólanna verður opið til kl. 22 í dag, 23. desember – Þorláksmessu, og enginn aðgangseyrir. Í boði er hádegisleiðsögn kl. 12 um sýningar Ann Noël, Teikn og tákn, og Karls Guðmundssonar, Lífslínur. Verið velkomin.

Önnur rafræna smiðja Listasafnsins undir yfirskriftinni Sköpun utan línulegrar dagskrár fór í loftið í október. Að þessu sinni var um að ræða danslistasmiðju í umsjón Urðar Steinunnar Önnudóttur Sahr, dansara og danskennara. Verkefnið fólst í að bjóða börnum og þeirra nánustu að taka þátt í listsmiðju á þeim tíma sem þeim hentar best. Smiðjan var tekin upp í Listasafninu og sýnd á netinu. Þannig gátu þátttakendur horft á smiðjurnar heima hjá sér og unnið verk. Afraksturinn er nú til sýnis í fræðslurýmis Listasafnsins og stendur til 3. janúar næstkomandi.