Fréttasafn

Í tilefni af opnun sýningar Ann Noël, Teikn og tákn, var haldið málþing um Noël og Fluxus-hreyfinguna síðastliðinn sunnudag.

Þriðjudaginn 28. september kl. 17-17.40 heldur myndlistarmaðurinn Bryndís Snæbjörnsdóttir Þriðjudagsfyrirlestur í Listasafninu á Akureyri undir yfirskriftinni Vísitasíur: Ísbirnir á villigötum. Aðgangur er ókeypis. Í fyrirlestrinum fjallar hún um myndlist hennar og Mark Wilson. Bryndís mun einnig fjalla um yfirlitsýningu á verkum þeirra sem opnaði í Gerðarsafni 11. september síðastliðinn og rannsóknarverkefnið Ísbirnir á villigötum sem er undirstaða sýningar þeirra Mark, Vísitasíur, sem var opnuð í Listasafninu síðastliðinn laugardag.

Fyrsta rafræna listsmiðja Listasafnsins er komin í loftið hér á heimasíðunni og á samfélagsmiðlum. Verkefnið felst í að bjóða fjölskyldum að taka þátt í rafrænni listsmiðju á vegum Listasafnsins. Í samvinnu við sína nánustu fá börn tækifæri til að skapa sitt eigið listaverk óháð stað og stund. Lögð er áhersla á að þátttakendur fái að sýna afraksturinn á sérstakri sýningu sem sett verður upp í Listasafninu. Frábært tilefni fyrir fjölskyldur að njóta samveru og skapa utan línulegrar dagskrár. Umsjón með fyrstu smiðjunni hefur Sigrún Björg Aradóttir, grafískur hönnuður.

Sunnudaginn 26. september kl. 11-12 verður boðið upp á fjölskylduleiðsögn í Listasafninu, en þá mun Heiða Björk Vilhjálmsdóttir, fræðslufulltrúi, segja börnum og fullorðnum frá sýningunni Takmarkanir. Að lokinni leiðsögn er gestum boðið að búa til sitt eigið listaverk, innblásið af verkum listamannanna.

Laugardaginn 25. september kl. 15 verða tvær sýningar opnaðar í Listasafninu á Akureyri, annars vegar sýning Bryndísar Snæbjörnsdóttur og Mark Wilson, Vísitasíur, og hins vegar sýning Ann Noël, Teikn og tákn. Á opnunardegi kl. 16 verður listamannaspjall við Bryndísi og Mark sem Æsa Sigurjónsdóttir, sýningarstjóri, stýrir.

Þriðjudaginn 21. september kl. 17-17.40 heldur ljósmyndarinn Sigurður Mar fyrsta Þriðjudagsfyrirlestur vetrarins í Listasafninu á Akureyri undir yfirskriftinni Fegurðin í ófullkomleikanum. Þar fjallar hann um aftengingu ljósmyndarinnar við raunveruleikann, en Sigurður hefur glímt við þetta viðfangsefni undanfarin ár. Hann vinnur langt frá hinum ofurskörpu stafrænu myndgæðum, en blandar nútímatækni við aldagamlar aðferðir.

Vefsíðan listfyriralla.is fór í loftið á dögunum en henni er ætlað að miðla listviðburðum um land allt og jafna þannig aðgengi barna á grunnskólaaldri að fjölbreyttum og vönduðum listviðburðum óháð búsetu og efnahag. Höfuðáhersla er lögð á menningu fyrir börn og menningu með börnum.

A! Gjörningahátíð fer fram á Akureyri dagana 7. - 10. október næstkomandi. A! er fjögurra daga alþjóðleg gjörningahátíð sem haldin er árlega og nú í sjöunda sinn. Ókeypis er inn á alla viðburði.

Sunnudaginn 12. september kl. 11-12 verður boðið upp á fjölskylduleiðsögn um sýninguna Ferðagarpurinn Erró. Heiða Björk Vilhjálmsdóttir, fræðslufulltrúi, segir börnum og fullorðnum frá sýningunni og einstaka verkum. Að lokinni leiðsögn er gestum boðið í skemmtilegan leik um sýninguna.

Bandaríska myndlistarkonan Jessica Tawczynski hefur dvalið í gestavinnustofu Listasafnsins undanfarnar vikur. Laugardaginn 4. september kl. 12 opnar hún sýningu í Deiglunni undir yfirskriftinni Lost At Sea / Týnd í Hafi þar sem hún sýnir afrakstur vinnu sinnar á Akureyri. Sýningunni líkur miðvikudaginn 8. september.