Fréttasafn

Laugardaginn 20. ágúst kl. 15 verður haldið útgáfuhóf í Listasafninu í tilefni útgáfu bókar Bryndísar Snæbjörnsdóttur og Mark Wilson, Óræð lönd. Bókin er gefin út í tengslum við sýningar þeirra Óræð lönd: Samtöl í sameiginlegum víddum, sem sett var upp í Gerðarsafni, og sýninguna Vísitasíur, sem sett var upp í Listasafninu á Akureyri. Fyrir síðarnefndu sýninguna hlutu þau Myndlistarverðlaun ársins 2022. Æsa Sigurjónsdóttir var sýningarstjóri sýningarinnar Vísitasíur en Becky Forsythe sýningarstjóri sýningarinnar í Gerðarsafni.

Listasafnið býður uppá skemmtilegan fjölskylduleik í sumar um sýninguna Gjöfin til íslenzkrar alþýðu. Tilvalið tækifæri fyrir börn og fullorðna til að staldra við og uppgötva eitthvað nýtt. Bragðgóð verðlaun í boði! Aðgangseyrir inn á safnið er ókeypis fyrir 18 ára og yngri.

Laugardaginn 16. júlí kl. 17 heldur tónleikaröðin Mysingur áfram í mjólkurporti Listasafnsins á Akureyri. Fram koma Drinni, Áslaug Dungal og Holy Hrafn. Enginn aðgangseyrir er á tónleikana. Hægt verður að kaupa grillmat og drykki frá Ketilkaffi á tónleikasvæðinu. Þriðji og síðasti tónleikadagurinn er 27. ágúst næstkomandi. Tónleikaröðin er samstarf Akureyrarbæjar, Ketilkaffis, Geimstofunnar, Listasafnsins á Akureyri, Kjarnafæðis og Kalda.

Laugardaginn 18. júní kl. 17 hefst tónleikaröðin Mysingur í mjólkurporti Listasafnsins á Akureyri. Þar munu koma fram hljómsveitirnar Ólafur Kram og Hugarró. Enginn aðgangseyrir er á tónleikana.

Laugardaginn 11. júní kl. 15:30 verður listamannaspjall með Gústav Geir Bollasyni um sýningu hans Sandtímasálmur um fölnandi jarðarblóm, sem var opnuð fimmtudaginn 2. júní síðastliðinn. Stjórnandi er Hlynur Hallsson, safnstjóri Listasafnsins.

Síðustu sýningunni í listvinnustofuröðinni Allt til enda lýkur næstkomandi sunnudag. Þar má sjá verk barna úr 3.-6. bekk sem þau unnu undir handleiðslu Sigurbjargar Stefánsdóttur skipa.

Fimmtudaginn 2. júní kl. 20 verða þrjár sýningar opnaðar í Listasafninu á Akureyri: Gústav Geir Bollason – Sandtímasálmur um fölnandi jarðarblóm, Auður Lóa Guðnadóttir – Forvera og ljósmyndasamsýningin Svarthvítt. Boðið verður upp á listamannaspjall um Svarthvítt kl. 21 og er stjórnandi Hlynur Hallsson, safnstjóri Listasafnsins. Fjölskylduleiðsögn um Svarthvítt og Forveru, sunnudaginn 5. júní kl. 11-12.

Sunnudaginn 5. júní kl. 11-12 verður fjölskylduleiðsögn í Listasafninu. Heiða Björk Vilhjálmsdóttir, fræðslufulltrúi, segir börnum og fullorðnum frá ljósmyndasamsýningunni, Svarthvítt, og sýningu Auðar Lóu Guðnadóttur, Forvera.

Alþjóðlegu samsýningunni Nánd lýkur næstkomandi sunnudag 22. maí. Af því tilefni verður boðið upp á listamannaspjall með einum af listamönnum sýningarinnar, Birgi Snæbirni Birgissyni, kl. 15 síðasta sýningardaginn. Þar mun Hlynur Hallsson, safnstjóri, ræða við Birgi um sýninguna og einstaka verk.

Alþjóðlegi safnadagurinn er haldinn hátíðlegur 18. maí ár hvert, en Alþjóðaráð safna, ICOM, hefur staðið fyrir safnadeginum síðan 1977. Á ári hverju velur ICOM deginum yfirskrift er tengist málefnum sem eru í brennipunkti í samfélaginu og er að þessu sinni „Mikill er máttur safna“. Í tilefni dagsins verður ókeypis inn á Listasafnið og boðið upp á leiðsögn kl. 15 um alþjóðlegu samsýninguna Nánd.