Fréttasafn

Í tilefni sumardagsins fyrsta, fimmtudaginn 21. apríl kl. 11-12, verður boðið upp á leiðsögn og smiðju fyrir börn á leikskólaaldri um sýninguna Sköpun bernskunnar 2022. Enginn aðgangseyrir er inn á Listasafnið í tilefni sumardagsins fyrsta.

Sunnudaginn 24. apríl kl. 11-12 verður fjölskylduleiðsögn í Listasafninu. Heiða Björk Vilhjálmsdóttir, fræðslufulltrúi, segir börnum og fullorðnum frá völdum verkum úr Listasafni ASÍ á sýningunni Gjöfin til íslenzkrar alþýðu.

Gleðilega páska! Listasafnið verður opið alla páskahátíðina kl. 12-17. Verið velkomin.

Laugardaginn 2. apríl kl. 15.00-15.15 og kl. 16.00-16.15 flytja Björk Níelsdóttir og Steinunn Arnbjörg Stefánsdóttir verkið Allt er ömurlegt fyrir sópran og selló. Höfundur ljóðs og tónlistar er Björk Níelsdóttir. Tónleikarnir fara fram í sal 04 og eru liður í tónleikaröðinni Tólf tóna kortérið sem unnið er í samstarfi við Tónlistarskólann á Akureyri. Aðgangur ókeypis.

Kanadíski myndlistarmaðurinn Aaron Mitchell hefur dvalið í gestavinnustofu Listasafnsins undanfarnar vikur. Föstudaginn 25. mars kl. 20 opnar hann sýningu í gestavinnustofunni. Þar verður gestum boðið að skoða innsetningu og ræða við listamanninn um listina og verkefnið, en 19 ár eru síðan hann sýndi síðast verk á Akureyri. Sýningin stendur til miðvikudagsins 30. mars.

Miðvikudaginn 30. mars kl. 14 verður haldið málþing í Listasafninu, sal 11, um listnám á háskólastigi á Akureyri. Lagt er upp með þá hugmynd að koma á nánara samstarfi á milli Háskólans á Akureyri og Listaháskóla Íslands með það fyrir augum að byggja upp listnám á háskólastigi á Akureyri.

Þriðjudaginn 29. mars kl. 17-17.40 heldur Margrét Katrín Guttormsdóttir, vöruhönnuður, Þriðjudagsfyrirlestur í Listasafninu á Akureyri undir yfirskriftinni Tækni í nýsköpun textíls. Í fyrirlestrinum mun hún stikla á stóru um textílnám sitt við Myndlistaskólann í Reykjavík og Listaháskóla Íslands, þaðan sem hún útskrifaðist úr vöruhönnun 2021. Einnig mun Margrét Kristín fjalla um hvað leiddi hana til Blönduósar þar sem hún starfa sem verkefnastjóri TextíLabsins hjá Textílmiðstöð Íslands. TextílLabið er fyrst sinnar tegundar á Íslandi þar sem tækni og menningararfur koma saman. Þar eru ótal möguleikar til textílþróunar og nýsköpunar til staðar með stafrænni tækni.

Sunnudaginn 27. mars kl. 11-12 verður fjölskylduleiðsögn í Listasafninu. Heiða Björk Vilhjálmsdóttir, fræðslufulltrúi, segir börnum og fullorðnum frá samsýningu skólabarna og myndlistarmannanna Aðalheiðar S. Eysteinsdóttur og Helga Þorgils Friðjónssonar, Sköpun bernskunnar 2022. Að lokinni leiðsögn er gestum boðið í smiðju og að búa til sitt eigið listaverk, innblásið af verkum listamannanna. Aðgangur ókeypis í boði Norðurorku sem styrkir fræðslustarf Listasafnsins.

Þriðjudaginn 22. mars kl. 17-17.40 heldur kanadíski myndlistarmaðurinn, Aaron Mitchell, Þriðjudagsfyrirlestur undir yfirskriftinni The Modern Mythology Project. Enginn aðgangseyrir er á fyrirlesturinn sem fer fram á ensku.

Bryndís Snæbjörnsdóttir og Mark Wilson hlutu í gær Myndlistarverðlaun ársins 2022 fyrir sýninguna Vísitasíur, sem var opnuð í Listasafninu á Akureyri 25. september 2021 og stóð til 16. janúar síðastliðinn.