Flýtilyklar
Þriðjudagsfyrirlestur: Hyo Jung Bea
Þriðjudaginn 14. mars kl. 17-17.40 heldur Suður-Kóreska myndlistarkonan Hyo Jung Bea Þriðjudagsfyrirlestur í Listasafninu á Akureyri undir yfirskriftinni Hyo Jung Bea Work: On underwater / Performance / Video / Installation. Aðgangur er ókeypis á fyrirlesturinn sem fer fram á ensku.
Í fyrirlestrinum mun Hyo Jung Bea kynna vídeóverk sem er innblásið af kvenkyns köfurum sem kallast Haenyeo og eru þekktar á eyjunni Jeju við Suður-Kóreu. Þessir kafarar eru fulltrúar einstaks mæðrasamfélags innan kóreskar menningar, sem er annars almennt afar karllæg.
Hyo Jung Bea vinnur með mismunandi miðla, s.s. gjörningalist, vídeó, skúlptúr, o.fl. Hún er menntuð í sjónlistum og hreyfimyndagerð frá tækniháskólanum í Seoul og CUNY Hunter College. Einnig lauk hún MFA gráðu í skúlptúr frá háskólanum í Jeju.
Fyrirlestraröðin er samvinnuverkefni Listasafnsins á Akureyri, Verkmenntaskólans á Akureyri, Gilfélagsins, Menntaskólans á Akureyri og Myndlistarfélagsins á Akureyri. Þetta er næstsíðasti fyrirlestur vetrarins, en þann síðasta heldur Stefán Þór Sæmundsson, rithöfundur og íslenskukennari, þriðjudaginn 21. mars.
Leit
