Flýtilyklar
Þriðjudagsfyrirlestur: Seung hee Lee
Þriðjudaginn 23. febrúar kl. 17-17.40 heldur Suður-Kóreska myndlistarkonan Seung hee Lee Þriðjudagsfyrirlestur í Listasafninu á Akureyri undir yfirskriftinni Urban remapping: Sensing map project. Í fyrirlestrinum, sem fer fram á ensku, mun hún fjalla um nýja, listræna nálgun í kortlagningum. Út frá kenningum Heidegger er lagt til að kort af t.d. borg sýni ekki einungis byggingar og götur heldur einnig upplifanir og tilfinningar (e. sensing map) og hefur Lee unnið í verkefnum þar sem slík kort eru gerð af mismunandi stórborgum víða um heim.
Seung hee Lee stundaði nám í listum, arkitektúr og menningarfræðum í London, en einbeitir sér nú að sjónlistum.
Enginn aðgangseyrir er á fyrirlesturinn. Fyrirlestraröðin er samvinnuverkefni Listasafnsins á Akureyri, Verkmenntaskólans á Akureyri, Gilfélagsins og Myndlistarfélagsins á Akureyri. Aðrir fyrirlesarar vetrarins eru Aðalsteinn Þórsson, myndlistarmaður, Magni Ásgeirsson, tónlistarmaður, og Vilhjálmur B. Bragason og Sesselía Ólafsdóttir, Vandræðaskáld.
Leit
