Flýtilyklar
Þriðjudagsfyrirlestur: Hlynur Hallsson
Breyting hefur orðið á áður auglýstum Þriðjudagsfyrirlestri næstkomandi þriðjudag 30. janúar kl. 17-17.40. Fyrirhugaður fyrirlestur Þorvaldar Bjarna Þorvaldssonar, tónlistarmanns, fellur niður af óviðráðanlegum örsökum. Í hans stað mun Hlynur Hallsson, safnstjóri Listasafnsins, halda fyrirlestur undir yfirskriftinni Nýtt Listasafn - nýir tímar. Þar mun hann ræða samfélagslegt hlutverk Listasafnsins á Akureyri, safnkennslu og þá möguleika sem nýtt safn hefur í för með sér. Hann mun m.a. varpa fram eftirfarandi spurningum: Hvað er safn? Hvert er hlutverk safna? Hver er þróun listasafna? Hvernig getur Listasafnið á Akureyri eflt bæinn sem menningar- og menntabæ og einnig sem spennandi áfangastað ferðamanna?
Hlynur Hallsson hefur verið safnstjóri Listasafnsins á Akureyri frá 2014. Hann lagði stund á myndlistarnám á Íslandi og í Þýskalandi og lauk mastersnámi 1997. Hann hefur starfað sem myndlistarmaður og sýningarstjóri og hefur skipulagt sýningar í Berlín, Hannover, Marfa; Texas, Kumamoto, Reykjavík og á Akureyri. Hlynur hefur einnig kennt við Listaháskóa Íslands, Myndlistaskólann á Akureyri og Háskólann á Akureyri.
Fyrirlestraröðin er samvinnuverkefni Listasafnsins á Akureyri, Gilfélagsins, Verkmenntaskólans á Akureyri, Myndlistafélagsins og Háskólans á Akureyri.
Á meðal annarra fyrirlesara vetrarins eru Andy Paul Hill, lektor í lögreglufræði, Alanna Jay Lawley, myndlistarkona, Rösk, listahópur, Elísabet Gunnarsdóttir, safnstjóri Listasafns ASÍ, Finnur Friðriksson, dósent í íslensku, Herdís Björk Þórðardóttir, hönnuður og Jeannette Castioni, myndlistarkona, og Ólafur Guðmundsson, leikari.
Leit
