Þriðjudagsfyrirlestur: Mireya Samper

Mireya Samper.

Þriðjudaginn 28. janúar kl. 17-17.40 heldur Mireya Samper, myndlistarmaður, sýningastjóri og listrænn stjórnandi, Þriðjudagsfyrirlestur í Listasafninu á Akureyri, Ketilhúsi undir yfirskriftinni Ferskir vindar 2010-2020. Í fyrirlestrinum fjallar hún um alþjóðlegu listahátíðina Ferskir vindar sem hún stofnaði 2010. Mireya talar um upphaf verkefnisins og þróunina á síðustu 10 árum, en einnig mun hún fjalla um einstaka hátíðir og nokkra af þeim 200 myndlistarmönnum sem hafa tekið þátt í hátíðinni.  

Mireya Samper útskrifaðist frá Ecole d’Art de Luminy í Marseille í Frakklandi 1993. Hún stundaði einnig nám við Myndlista- og handíðaskóla Íslands 1987-90 og Academia di Bologna á Ítalíu 1992. Hún hefur haldið fjölda einkasýninga á Íslandi og erlendis auk þess að taka þátt í fjölmörgum samsýningum. Mireya er stofnandi, framkvæmdastjóri og listrænn stjórnandi alþjóðlegu listahátíðarinnar Ferskir vindar.

Þriðjudagsfyrirlestrarnir eru samvinnuverkefni Listasafnsins á Akureyri, Gilfélagsins, Verkmenntaskólans á Akureyri, Myndlistarfélagsins og Háskólans á Akureyri. Á meðal annarra fyrirlesara vetrarins eru JBK Ransu, myndlistarmaður, Marco Paoluzzo, ljósmyndari, Snorri Ásmundsson, listamaður, Ragnheiður Eríksdóttir, tónlistarkona, Kristín Dýrfjörð, dósent við Háskólann á Akureyri, og Kenny Nguyen, myndlistarmaður.