Gómsætt - síðustu sýningardagar

Framundan eru síðustu dagar sýningarinnar Gómsætt í Ketilhúsinu. Þar fjallar Dagrún Matthíasdóttir um mat og reiðir fram alls konar rétti úr eldhúsi myndlistarinnar, jafnt hefðbundin málverk sem fjöltæknilega bragðarefi. Þannig fá gestir sýningarinnar vatn í munninn um leið og hugtökin tilraunaeldhús og heimabakstur eignast nýja merkingu. Dagrún vinnur með ólík efni og aðferðir og velur það sem hentar viðfangsefninu hverju sinni. Frásögn bregður fyrir í verkum hennar þar sem hún gramsar í matnum og gefur honum hlutverk með túlkun sinni í formum og litum.

?Ég vinn með liti, áferð, form og mynstur og skapa ólíka stemningu í samtali mínu við matinn. En um leið leyfi ég mér að nálgast leikinn í sjálfri mér?. ?D.M.

Hugleiðing

Sagt er að þú sért það sem þú borðar. Reynist sú kenning rétt hafa Íslendingar lengst af verið algjörir sauðir og þar sem við sporðrennum sjávarfangi hljótum við einnig að vera dálítið eins og fiskar á þurru landi, þorskhausar með kindaskrokka, svo ekki sé minnst á samruna við plöntur og aðrar dýrategundir. Dagrún Matthíasdóttir (f. 1971) sér hversu frek mannskepnan er til matar, enda elskum við ekki síður að éta lömbin en að dásama hversu falleg og góð þau eru. Á sýningunni Gómsætt reiðir Dagrún fram alls konar rétti úr eldhúsi myndlistarinnar, jafnt hefðbundin málverk sem sjónræna bragðarefi, þannig að við fáum vatn í munninn um leið og hugtökin tilraunaeldhús og heimabakstur fá alveg nýja merkingu. Við þurfum að horfast í augu við sambandið á milli kjafts og glyrna, því hvenær étur maður mann og hvenær ekki? Kristnir menn leggja sér reglulega Jesú til munns og við tölum um augnakonfekt og fúlsum við mat sem lítur illa út. Í því sambandi má minnast þess að vesturlandabúar henda stórum hluta matarframleiðslu sinnar og samkvæmt Alþjóða matvælastofnunni þjást 842 milljónir af næringarskorti. Leikum okkur ekki að matnum nema í myndlíkingum. Kyngjum honum!