Fréttasafn

Bandaríska myndlistarkonan Katie Raudenbush hefur dvalið í gestavinnustofu Listasafnsins undanfarnar vikur og þriðjudaginn 25. júní kl. 15-17 verður vinnustofan opin gestum og gangandi. Katie Raudenbush er frá New York í Bandaríkjunum og vinnur fyrst og fremst með textíl og ljósmyndir. Á vinnustofunni má sjá afrakstur vinnu hennar síðustu vikur og m.a. túrmerik klippimyndir sem eru innblásnar af íslensku landslagi.

Á þjóðhátíðardaginn 17. júní kl. 12 fer fram fyrsti Mysingur sumarsins á útisvæði Ketilkaffis fyrir framan Listasafnið á Akureyri. Þá mun Biggi í Maus – Birgir Örn Steinarsson – koma fram ásamt Þorsteini Kára Guðmundssyni. Enginn aðgangseyrir er á tónleikana og hægt verður að kaupa mat og drykki frá Ketilkaffi á svæðinu. Tónleikaröðin er hluti af Listasumri og unnin í samstarfi Akureyrarbæjar, Listasafnsins á Akureyri, Ketilkaffis og Geimstofunnar.

Laugardaginn 8. júní kl. 15 verður sýningarstjóraspjall í Listasafninu um samsýninguna Er þetta norður? Hlynur Hallsson, safnstjóri og annar sýningarstjóra, mun segja frá sýningunni, tilurð hennar og einstaka verkum.

Fimmtudaginn 6. júní kl. 20 verða tvær sýningar opnaðar í Listasafninu á Akureyri: Samsýningin Er þetta norður? og Fluxus sýningarverkefnið STRANDED – W(H)/ALE A REMAKE PORTFOLIO – MORE THAN THIS, EVEN. Boðið verður upp á listamannaspjall með Inuuteq Storch og Gunnari Jónssyni um fyrrnefndu sýninguna og sýningarstjóraspjall með Wolfgang Hainke og Freyju Reynisdóttur um þá síðarnefndu. Fyrr um kvöldið, kl. 19.30, verður boðið upp á örtónleika með tveimur meðlimum grænlensku hljómsveitarinnar Nanook.

Listasafnið á Akureyri festi á dögunum kaup á lykilverki Guðnýjar Kristmannsdóttur, Play Me, af sýningu hennar Kveikja sem lauk nýverið á safninu. Verkið hlaut verðskuldaða athygli sem og sýningin sjálf. Á fundi Listasafnsráðs var einnig ákveðið að kaupa verk af myndlistarfólkinu Jónu Hlíf Halldórsdóttur og Magnúsi Helgasyni.

Í tilefni af síðustu dögum sýningar Guðnýjar Kristmannsdóttur, Kveikja, verður boðið upp á listamannaspjall með Guðnýju næstkomandi laugardag kl. 15.

Sunnudaginn 26. maí kl. 11-12 mun Heiða Björk Vilhjálmsdóttir, fræðslufulltrúi, segja börnum og fullorðnum frá einkasýningum Heiðdísar Hólm, Vona að ég kveiki ekki í, og Salóme Hollanders, Engill og fluga. Að lokinni leiðsögn er gestum boðið að búa til sitt eigið listaverk, innblásið af verkum sýninganna.

Í tilefni Alþjóða safnadagsins, 18. maí næstkomandi, verður ókeypis inn á Listasafnið. Yfirskrift Alþjóðlega safnadagsins í ár, Söfn í þágu fræðslu og rannsókna, snýr að mikilvægi menningar-stofnana þegar kemur að því að bjóða upp á heildræna fræðslu og tækifæri til þekkingaröflunar. Þá er mark-miðið með því að halda upp á daginn að stuðla að vitundarvakningu í þessum efnum, sem og að ýta undir sjálfbæra hugsun og auka jöfnuð á heimsvísu.

Lilja Alfreðsdóttir, menningar- og viðskiptaráðherra, og Ásthildur Sturludóttir, bæjarstjóri, undirrituðu í gær samkomulag um eins árs framlengingu á samstarfsamningi bæjarins og ríkisins um menningarmál og gildir hún út árið 2024.

Laugardaginn 11. maí kl. 15.00-15.15 og kl. 16.00-16.15 verður Tólf tóna kortérið á dagskrá í Listasafninu í síðasta sinn fyrir sumarfrí, en þá mun Ásdís Arnardóttir, sellóleikari, frumflytja verk Sunnu Friðjónsdóttur, Noises of the Blue Planet – The Creatures Slowly Wake Up.